الأحد، 1 فبراير 2009

مذكرات الكورس الماضي..

بسم الله الرحمن الرحيم..
كنوع من التغيرر حبيت أكتب هذا الموضوع باللهجة العامية..

أول شي أحب أشكر كل من سأل عني وعن دراستي .. واليوم ييتكم بالبشارة :)..


كانت درجاتي هذا الكورس عالعـــــــــــــال ..! D:


اللهم لك الحمد والشكر كما ينبغي لجلال وجهك وعظيم سلطانك :")..

في شي بدراستي وايد غريب..

أنا ورفيجاتي.. مسجلين نفس المواد ..
بس الفرق اللي بيننا إن رفيجاتي يدرسون أكثر مني.. ومن صج تاخذ الدراسة من وقتهم وايد!
أما أنا فأدرس ..لكن لأني متلتزمة بشغلخارج الكلية وداخلها ودورات، فما أدرس كثرهم.. ومع هذا أحصل على نفس درجاتهم إذا مو أعلى..



لما أقعد أتأمل بهالمواقف اللي تصير معاي.. أقول بقلبي والله يارب إنهم درسوا أكثر مني ..! وساعات أحس يقولون بقلبهم هذي جذابة تقص علينا إذا قالت لنا إنها تدرس شوية !

يعني والله أقولكم إياها لوما ما بركة الله عز وجل في وقتي وتوفيقه جان ما حلمت ولا ربه هالدرجات ..! خصوصا في كلية مو وايد سهلة وبتخصص كلش مو سهل..

نقطة ثانية كانت السبب ورا هذي النتايج هي إن الله سبحانه أعانني على إني أسوي كل اللي علي في إني أدرس البنات اللي معاي وأشرحلهم حتى لو يكون من باجر عندي إمتحان.. كان شعاري بالضبط " من كان في حاجة الناس كان الله في حاجته " .. فعشت الكورس اللي طاف بنفسية خيال وإيجابية توصل السما ولله الحمد..
الطاقة اللي يتني ماكانت طبيعية .. وأتمنى إنها تظل تستمر معاي :) الحمد لله..

كنابتي لهالجزئية هي لسبب تحفيزي في إن الفرصة ما تيي إلا مرة وحدة .. فإذا صادفت بحياتك أي أحد محتاج مساعدتك فلا تفكر تطوفها !

********




بما إن موضوعي اليوم عن الدراسة فراح أكمله على نفس الموضوع ..

وضع الكورس اللي مريت فيه..

*درست مادة إختيارية بالتربية.. المادة كلها تشجع على التفكير الإبداعي ،وشلون نوظف تفكيرنا بغير الطريقة الطبيعية اللي إحنا متعودين عليها.. المادة تاخذون فيها A بالسهالات .. وجدا ممتعة .. من أحلى الأشياء اللي صارت بهذا الكلاس إن ببداية الكورس كل وحدة الدكتورة عطتها إسم بنت ما تعرفها، وواجب عليها إنها تراقب هذي البنت اللي معاها بالكلاس وتكتب إيجابياتها وسلبياتها.. :) وآخر الكورس نرد الأوراق للدكتورة وإهيا توزعهم مرة ثانية بحيث كل وحدة ما تدري منو اللي اكتبت عنها :)..

*مادة MIS .. الدكتور ما يدري وين الله حاطة .. بس على نياته.. كل يوم ياينا بشي.. أذكر مرة توه داش الكلاس جان يقولنا أنا قاعد أسوي دراسة وأبي أثبت نظريتي هذي معاكم .. والدراسة كانت إن معظم الشعب الكويتي يختار السيايير على أساس السعر والفخفخة على قولته .. ومو على أساس جودة المكينة والدولة المنتجة.. فسوى تصويت على سيايير معينة وفعلا أثبت على قولته نظريته عقب ما اكتشف إن وقت الكلاس خلص !

*مادة تخصص للأسف كانت إختلاط .. والدكتور عادي يقط قطات.. فحسي ما طلع ..

*مادة إحصاء عند دكتور باله وسيــــــع ما شاء الله.. مستعد يجابلنا 24 ساعة علشان يوصل لنا المعلومة..

*مادة إدارة .. دكتور أقول عنه خيال وشوي عليه .. ما شاء الله .. لدرجة إني كنت مفكرة أنزل بوست كامل عنه الله يوفقه..

وإذا كملت دراستي يوم من الأيام فبسببه بعد توفيق الله عز وجل.. المهم سيستم هذا الدكتور:

1- إذا رن تلفون طالب/ة بالكلاس لازم يقول خاطرة بالكلاس الياي مدتها ما تزيد عن دقيقة ونص. وإذا زادت عن هالمدة يطالب بخاطرة ثانية.. الخاطرة : يقدر يقول أي شي يفيد فيه الطلبة الحاضرين..

2- كل كلاسين يعطينا خاطرة ويربطها مع الموضوع اللي قبلها وبنهاية الكورس تتكون عندنا مفاهيم وقصة كاملة.

3- كل أربعاء ملزوم علينا نسلم درسين تعلمناهم هذا الأسبوع "طبعا درجات تسليم هذا التكليف بمثابة bonus لنا".

4- يعامل الكل بإحترام وتواضع ما تتخيلونه ..! أذكر إني مرة جاوبت غلط جان يقولي الظاهر أنا ما شرحت السؤال عدل :o .. ! "والله هذي أنا اللي خداي ما فهمت :s !

5- إحنا الوحيدين عن باجي الكلاسات اللي طلب منا مشروع عبارة عن شركة منتجات غذائية.. المشروع تقسم على مجاميع ،وكل مجموعة كانت مكلفة بجزء من عملية إتمام المشروع، بحيث يصير عندنا بالنهاية مشروع كامل وواضح يقدر أي أحد يتبناه..

6- أهم نقطة اتفقنا عليها معاه في بداية الكورس إن كلا الطرفين " الطلبة والدكتور" ماراح يقبل من الثاني إلا العمل المتقن :)..

وإذا حبيت أكتب كل الأشياء اللي تعلمتها من هذا الدكتور فماراح أخلص .. وماقول غير عسى الله يكثر من أمثاله..


وأختتم بوستي ب..

واااااااااأردوغانااااااه !!

حقا إن الشدائد تظهر معادن الرجال

هناك 14 تعليقًا:

ابوالوليد يقول...

مبروك التفوق ومنها للأعلى

وتستاهلين كل خير

والله يكافيج من الحسد

مستعدة يقول...

الأخ أبو الوليد:

الله يبارك بحياتك جزاك الله خير .. أجمعين يــــا رب ! الحمد لله ..

غير معرف يقول...

بارك لله فيج وخيتي

ومنها لأعلى ..

شي يشوق البركة .. تعطي الإنسان احساس بالإطمئنان

ربي يسهل دربج...

أبو لطيف يقول...

ما شاء الله لاقوة الا بالله

مبروك

والله يبارك فيك

وسهل كل امورك حتى تنالي اعلى الشهادات يا رب


نعم ....
" من كان في حاجة الناس كان الله في حاجته " ..

اللهم لك الحمد والشكر

حفظك الله ورعاك

الكلداري يقول...

يحلو المقام بشيء من التغيير .
اولا مبارك عليك النجاح وفي المرات القادمة A من الكبيرة ، مع تقدير نهائي تخرج بدرجة الامتياز .
MIS هذه مادة نظم معلومات ادارية ؟ ايشدخله في النظريات الاجتماعية ؟؟؟
في نظري يكون من التقدير ان تذكري اسم الدكتور صاحب الاسلوب العجيب ليرفع ذكره في الارض .
شكله تربية مخيمات .
ما شاء الله عليك تدرسين ودرسين و تشتغلين هذا ما شاء الله عزيمة عسى ربي يحفظك وخليك على القوة .
موضوع الشغل يبيلنا تتكلمين عنه وتجربتك .اذا مافيها احراج !!

مستعدة يقول...

حجر كريم:
إي والله.. بالنسبة لي.. البركة هي السحر الطيب الموجود على الأرض.. وياج بالحبيبة:)



*****

الأخ بو لطيف:
أجمعين يارب..
عسى ربي يحفظك ويديم علينا وعليك هالنعم اللي حوالينا..


*****

الكلداري:

الله يبارك بحياتك .. ولله الحمد كان التقدير امتياز :)
عليك تور.. المادة
management infirmation system..
بس حبيت أبين درجة إندماج الدكتور بالمادة@@!

جزاك الله خير.. أنا كنت ناوية أكتب أسمه بس لسبب حبيت أحتفظ بإسمه لهالفترة بس بعدين أفصح عنه إن شاء الله..
موضوع الشغل كالترمومتر بالنسبة لي.. فلذلك دائما ندعو الله سبحانه بأن يستخدمنا ولا يستبدلنا..

جزاك الله خير على هالتفاعل وإن شاء الله يكون لي بوست يخص هالموضوع:)..

العدالة الكويتية يقول...

موفقات في التدوين الإيجابي
ولفت نظري بجانب أشياء كثيرة
هذا الدكتور القدوة!
ما شاء الله لا قوة إلا بالله

يوميًا نسمع قصص صفاقة دكاترة
جميل أن نسمع آخرين مهذبين
ومتقنين في عملهم
ومستشعرين عظم المسؤولية فيه

الحمد لله والشكر له
ثم الشكر لكنّ على تعريفنا
بهكذا نماذج مميزة
تسعد الخاطر وتشرف الوطن

HamoOora يقول...

قواج الله..


من هالدكتور خناخذ عنده P:


موفقة..

HamoOora يقول...

قواج الله..


منو هالدكتور خناخذ عنده P:


موفقة..

بوعمر يقول...

مبروك وبالتوفيق ،،،
والفال لي إنشالله باختبار التخرج آخر السنة

Q8 uniQue يقول...

منها للأعلى إن شاء الله, وعقبال التخرج مع مرتبة الشرف :)

وبالنسبة للنقطة الأولى اللي أثرتيها بموضوع مدّة الدراسة وعلاقتها مع الدرجات فأعتقد أن بعض الطلبة اللي يدرسون لفترات طويلة قبل تقديم الإمتحان ودرجاتهم قليلة أعتقد أن السبب الأوّل لتدني تحصيلهم هو أنهم وقت خبّة الإمتحانات يدرسون مباشرة من الكتاب وتلقينهم من بداية الكورس مهملين لموضوع التلخيص, ولابد الطالب يعرف "تقسيمة وشكل الإمتحان" من بداية الكورس عشان يعرف من أولها من وين تؤكل الكتف.

أشكرج :)

داعية الغد يقول...

السلام عليكم ورحمة الله..

مبرووك لكِ تفوقكِ,,



لسه حنا ما دخلنا ع الاختبارات (الأسبوع الجاي إن شاء الله نبدأ)

الله يوفقك في حياتك...

مستعدة يقول...

الأخ العدالة الكويتية:

الحمد لله .. ففي كل صورة جانب مشرق ..
حياك الله..


*****

هامورة:
الله يقويج .. :)
د.يدرس عندنا مادة كلية بالإدارية ..
إذا كنتي بكليتنا فما يحتاي أقول إسمه لأنه وايد معروف ما شاء الله

مستعدة يقول...

الأخ بوعمر:

الله يبارك بحياتك جزاك الله خير .. وعسى الله يفتح عليك وتتوفق دنيا وآخرة ..




*****

q8 unique:

تشكر على هالدعوات الطيبة .. وشاكرة مرورك لأني بصراحة نسيت إن صارلي فترة مو زايرة مدونتك ..
وفعلا الكلام اللي قلته صحيح.. لكن النقطة اللي حبيت أوضحها وأركز عليها هو موضوع البركة في الوقت :) شكرا..


*****

داعية الغد:

وعليكم السلام ورحمة الله وبركاته.. يزاج الله خير..
عسى الله يفتح عليج يارب وييسر عليج كل أمورج ويباركلج بوقتج .. نبي درجات تبيض الويه :) ناطرين البشارة ..